29-11-2015
O vindeiro domingo, 29 de novembro, ADEGA-Lugo organiza un roteiro polo concello de Castro de Rei que inclúe unha visita guiada ao Castro de Viladonga, a Ruta do Azúmara e a subida ao Monte da Escrita. O roteiro realízase dentro do ciclo de roteiros 2015-2016 denominado "Memoria Pétrea" e cuxo obxectivo será coñecer aqueles elementos patrimoniais da nosa cultura máis antiga, como son os castros.
A dificultade será baixa e a lonxitude de 8 km, podendo ampliarse opcionalmente en 3 km máis para subir á Serra da Escrita.
Principiaremos a xornada cunha visita guiada ao Castro de Viladonga e ao seu museo anexo. Neste castro da época tardorromana apareceu o torques que os Amigos da feira de Castro de Rei, promotores da ruta do Azúmara, tomaron como símbolo da mesma. No castro, iniciaremos a andaina polo Monte do Cordal desde o que hai unha ampla panorámica da Serra de Meira e do Pedregal de Irimia.
Atravesando o Monte das Penas irémonos achegando ás beiras do Río Azúmara. Avanzando pola súa ribeira chea de bidueiras poderemos ver a grandiosa Pena de Padorne. No lugar de Monelos deterémonos a contemplar a casa murada de Portas e un muiño. Atravesando o río pola Ponte de Lastra chegaremos á Mina de Arsénico, hoxe sen explotación pero moi relevante para a economía local na metade do século pasado. Seguindo a ruta chégase ao Muíño de Prado e finalmente remátase en Castro de Rei.
A ruta está salpicada con referencias a varios escritores vinculados á comarca: Manuel María, Marica Campo, Avelino Díaz, Lois Diéguez, Díaz Castro, etc.
Lonxitude: 8 km, de dificultade baixa.
*Opcional (+ 3 km): ADEGA propón realizar ao final do día o via crucis que conduce á estatua do Sagrado Corazón, en plena Serra da Escrita desde onde se contempla unha das panorámicas máis fermosas da Terra Chá. Este engadido de 3 km máis será opcional.
A reserva de praza debe realizarse, chamando ao local de ADEGA-Lugo (982240299) ou ao móbil (679113718) antes do venres 27 de novembro.
Faranse reservas até esgotar prazas!
A SAÍDA do autobús terá lugar o domingo, 29 de novembro, diante da Facultade de Profesorado de Lugo (antigo Maxisterio) ás 9 HORAS.
Se por algunha razón, as persoas que xa teñan reservado praza non poden asistir ao roteiro, prégase que avisen por teléfono coa máxima antelación posible para dar cabida a que outra xente participe.
Os prezos para a realización desta actividade son:
O roteiro discorrerá por unha zona bastante húmida, polo que aconsellamos levar roupa e calzado axeitados (impermeable) para non mollarse.
O bo humor será cousa de todas e todos!
Anímate a participar!
ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal